Hazaron Mushkilen Hain Aur Lakhon Gham Liye Hain Hum

Shayan Quraishi

hazaron mushkilen hain aur lakhon gham liye hain ham

mohabbat ka magar hathon men ik parcham liye hain ham

vo naghme jo ḳhizan ko phir bahar-e-nau banate hain

unhi giton ki honTon par na.i sargam liye hain ham

hamare dil men hai jazbat ka tapta hua suraj

jo palkon se chuni vo dard ki shabnam liye hain ham

mubarak ho ḳhirad valon tumhen fikr-o-nazar apni

hain ahl-e-dil bahar-e-ishq ke mausam liye hain ham

palaTiye gar kabhi fursat mile auraq maazi ke

hamari kya sifat bhi aur kya kya gham liye hain ham

samajh li ab haqiqat rahbaran-e-mulk ki sab ne

namak chuTki men le kar kah rahe marham liye hain ham