Akhilesh Tiwari
gutthi na sulajh paai go suljhai bahut hai
jo ḳhuub luTai thi vo shai paai bahut hai
phislan ye kinaron pa ye Thahrav nadi ka
sab saaf ishare hain ki gahrai bahut hai
darta huun kahin ḳhud se na ho jaae mulaqat
is dil ki guzargah men tanhai bahut hai
parbat si haqiqat bhi dalilon men paḌe kam
be-par ki uḌana ho to bas raai bahut hai
kya dekh ke lauTe hain mohabbat ki gali se
kya baat hai avaz kyuun bharrai bahut hai
Leave a Reply