Bedam Shah Warsi

Mujhe Shikwa Nahin Barbaad Rakh Barbaad Rahne De

mujhe shikva nahin barbad rakh barbad rahne de

magar allah mere dil men apni yaad rahne de

qafas men qaid rakh ya qaid se azad rahne de

bahar-surat chaman hi men mujhe sayyad rahne de

mire nashad rahne se agar tujh ko masarrat hai

to main nashad hi achchha mujhe nashad rahne de

tiri shan-e-taghaful par miri barbadiyan sadqa

jo barbad-e-tamanna ho use barbad rahne de

tujhe jitne sitam aate hain mujh par khatm kar dena

na koi zulm rah jaae na ab be-dad rahne de

na sahra men bahalta hai na ku-e-yar men thahre

kahin to chain se mujh ko dil-e-nashad rahne de

kuchh apni guzri hi ‘bedam’ bhali maalum hoti hai

miri biiti suna de qissa-e-farhad rahne de

More Poems

Leave a Comment