piite hain mai gunah ba-qasd-e-savab hai
masti ke valvale hain zaman-e-shabab hai
ai charagar nadamat-e-be-ja na lijiyo
dil chaak ho chuka hai jigar aab aab hai
zahid muaaf zabt-e-tabiat nahin hamen
saghar chhalak rahe hain hava-e-shabab hai
bedariyan hain dida-e-zanjir ki tarah
vo aankh hai azal se jo mahrum-e-khvab hai
ai shor-e-hashr thahar ki fursat nahin hamen
hain ghaflaton ke josh javani ka khvab hai
ai shaikh tul-e-rish-e-muqaddas ghataiye
had se ziyada jo hai usi par azaab hai
ai be-khabar qarib hai farda-e-baz-purs
hushiyar ho ki jald zaman-e-hisab hai
dekha nigah-e-ghaur se ham ne jo ai ‘nasim’
har sher is ghazal ka tiri intikhab hai
Leave a Reply