Zakir Khan Zakir
ḳhaak sahraon ki palkon pe saja li ham ne
zindagi jaisi mili hans ke nibha li ham ne
jam-e-gham piite rahe mai ka sahara na liya
darmiyan dard ke ik raah nikali ham ne
shahr-dar-shahr phire dasht-o-daman men bhaTke
masnad-e-qais dil-o-jan se sambhali ham ne
ham bhi ashkon ki tijarat ka hunar rakhte hain
ashk arzan the bahut sharh baḌha li ham ne
lamha lamha tire ehsas ne karvaT badli
raat ḳhvabon pe jami gard haTa li ham ne
ham se puchha tha kisi ne ki mohabbat kya hai
be-ḳhudi men tiri tasvir bana li ham ne
ruuTh kar shahr-e-nigaran ke chalan se ‘zakir’
apni duniya hi bahut duur basa li ham ne
Leave a Reply