hava ne siine men ḳhanjar chhupa ke rakkha hai
ye dekhna hai ki ab vaar kis pe karta hai
ḳhabar ye aam hai phir bhi ye kaisa parda hai
ki TuuTa aa.ina us ne sambhal rakkha hai
zaban bhi chup hai faza par hai ḳhamushi taari
hai kis ka ḳhauf tujhe kyuun kisi se Darta hai
tumhare paanv ke niche kahin zamin hi nahin
safar ka kar ke tu kaise irada baiTha hai
hui hai shaam darichon pe chand chamke hai
hai kis ka saaya jo shab bhar sisakta rahta hai
kahan kahan na parindon ne pankh phaila.e
magar ye kya ki kisi shaḳh par Thikana hai
Leave a Reply