Unki Chashm-E-Mast Mein Poshida Ek Mai-KHana Tha

Poet

un ki chashm-e-mast men poshida ik mai-ḳhana tha

jaam tha saghar tha mai thi shisha tha paimana tha

kya faqat mera hi ik chhalka hua paimana tha

jo bhi un ki bazm men tha hosh se begana tha

iḳhtilaf-e-shakl ne dhoka nigahon ko diya

varna jo kuchh sham-e-sozan thi vahi parvana tha

kis tarah chhupta miri TuuTi hui tauba ka raaz

ek main tanha na tha maiḳhane ka mai-ḳhana tha

yaad itna rah gaya hai qissa-e-ahd-e-shabab

ik ḳhumar-e-be-ḳhudi tha aap se begana tha

zard chehra band lab ankhon men aansu dil pe haath

be-zabani ki zaban thi aur mira afsana tha

husn ki duniya ke saath un ki taraf duniya-e-ishq

aur yahan dil hi na tha aur tha bhi to divana tha

jis ki pamali men muzmar abiyari thi ‘vaqar’

main riyaz-e-dahr men vo sabza-e-begana tha