ik lamha jo furqat ke siva aur bhi kuchh tha
ik gham jo qayamat ke siva aur bhi kuchh tha
ik chehra nigahon ke liye faiz-rasan tha
ik ḳhvab ziyarat ke siva aur bhi kuchh tha
ik naqsh tasavvur ke pare bhi tha mujassam
ik vahm haqiqat ke siva aur bhi kuchh tha
ik daagh jo rakhta tha mire siine ko raushan
ik naam jo tohmat ke siva aur bhi kuchh tha
ik saut-e-mahz raunaq-e-virani-e-dil thi
ik gul dam-e-vahshat ke siva aur bhi kuchh tha
ik yaad ḳhayalon ke alava bhi thi maujud
ik zaḳhm aziyyat ke siva aur bhi kuchh tha
ye daur qayamat ka jise ham ne guzara
ik umr ki mohlat ke siva aur bhi kuchh tha
Leave a Reply