abdul-ahad-saaz

Aawaz Ke Moti

sher ke jadugar sangit ke sahir

misron aur dhunon ke khali sipon ke kashkol uthae

afsurda maghmum khade hain

suuni ankhon men tuuti ummid liye

avaz ke un nauras qatron ki

jo khali sipon men amrit ban kar tapken

aur iz.har guhar ban jaae

lafz ki bandish taal ki sangat raqs ke tevar

be-harkat be-jan dhare hain

un honton ki hasrat men

jin ki pechida tarsil khamida jumbish

saut o bayan ko maani ki sau jihten bakhsha karti thi

yaad men us pur-nur dahan ki

jis se ubalti tah-dar-tah avaz ke raushan jaadu se

shabd suron men ghul jaate the

nok-e-qalam se barbat ke taron tak jalte daagh

ab-e-sada se dhul jaate the

(us ke dilkash giit havaon ke honton par sadiyon tak mahfuz rahenge)

shor bhari duniya ki dukhi tanhai men

umr ki jis manzil pe jis jivan ki Dagar par

jazbon ki jis rahguzar par

dil ka musafir pal-do-pal ko thahrega

us ki sada ke hamdam haath

bujhi hui bezar samaat ke shane thapkenge

man ka dukh bantenge

ranj khushi mausam tyauhar

vasl judai dard qarar

ummidon ki masti tuute khvabon ki uljhan

zulm baghavat gaanv vatan

ahd-e-kuhan ke ramz nae yug ki tafsiren

ishq ibadat aina-khane tanviren

har ghar har mahfil us ki avaz ke moti

bam-e-hava se barsenge

aah magar

alfaz ki bandish taal ki sangat raqs ke tevar

us ke dhun ke nae ujalon nae ufuq ko

rahti duniya tak tarsenge

More Poems

Leave a Comment