Krishna Mohan
aarzu tadbir ho kar rah ga.i
justuju taḳhir ho kar rah ga.i
sard sannaTa musallat ho gaya
be-hisi zanjir ho kar rah ga.i
soch ki avaz kitni tez hai
ḳhamushi taqrir ho kar rah ga.i
jab bhi ki tahrir apni dastan
teri hi tasvir ho kar rah ga.i
kaaT hai alfaz ki kitni shadid
guftugu shamshir ho kar rah ga.i
aah ye din rain ki bechain soch
jo miri taqdir ho kar rah ga.i
said-e-taḳhrib-e-ḳhirad hai zindagi
hasrat-e-tamir ho kar rah ga.i
harf-e-sanjida thi rudad-e-ḳhirad
kitni be-tasir ho kar rah ga.i
ahd-e-hazir ki kitabi sha.iri
fikr ki jagir ho kar rah ga.i
mere fikr-o-fan ki azmat aḳhirash
shoḳhi-e-tahrir ho kar rah ga.i
‘kirshn’ mohan ḳhvab ki tabir bhi
dard ki tafsir ho kar rah ga.i
Leave a Reply