Noshi Gilani
bichhadte lamhon men
us ne mujh se kaha tha dekho
”hamari rahen juda juda hain
magar hamen ek dusre ka khayal rakhna hai zindagi bhar
kisi bhi lamhe udasiyon ki
fasil haail na hone dena
hava ke hathon pe likhte rahna
judaiyon ke tamam qisse
qadam qadam par jo pesh aaen
vo sanehe bhi nazar men rakhna
main jab bhi lauta to apne honton ki tazgi ko
tumhari bujhti hui in ankhon men la rakhunga
jo meri apni hain sirf meri”
bichhadte lamhon men us ne mujh se na jaane kya kuchh kaha suna tha
aur ab
use bhi yahi kahega
vo jis ke hathon men haath daale
nae safar par nikal pada hai
Leave a Reply