surat-e-zanjir mauj-e-ḳhun men ik ahang hai
agahi ki had pe ik ḳhvab-e-junun ki jang hai
jaane kin chehron ki lau thi jaane kis manzar ki aag
niind ka resham dhuan hai ḳhvab sho.ala-rang hai
ik junun-ḳhane men ḳhud ko DhunDhta hai aadmi
ḳhud-tavafi men bhi ḳhud se sainkaḌon farsang hai
kirm-ḳhurda kashtiyan bina.i ki hain tah-nashin
nam hava se ustaḳhvanon men utarta rang hai
aag ko gulzar kar de us dua ka vaqt hai
varna ḳhu-e-adamiyat aadmi par tang hai
bu-e-gul ruḳhsat hui shayad ye ho ḳhatm-e-bahar
TuTti lai men bikharti saut-e-shab-ahang hai
ek markaz par ziden yakja hain aur gardish men hain
ye zamane ka taghayyur alam-e-nairang hai
Leave a Reply