Mohsin Zaidi
umiid koi nahin aasra bhi koi nahin
dava bhi koi nahin ab dua bhi koi nahin
kuchh itne ho ga.e bezar apne haal se log
ki apne haal pe ab sochta bhi koi nahin
bata.e kaun vahan kya guzar ga.i kis par
ki is dayar se aaya gaya bhi koi nahin
hisar-e-jan ke vo us paar hi to rahta hai
faqat hai shart-e-safar fasla bhi koi nahin
guzar hua jo kabhi us se mil liye varna
saval us se kuja mudda.a bhi koi nahin
mire suḳhan ne mujhe ru-shanas sab se kiya
vagarna chehre se pahchanta bhi koi nahin
hamin ne ḳhud pe kiye band saare dar ‘mohsin’
nikalna chahen to ab rasta bhi koi nahin
Leave a Reply