Tashna Azmi
qalb-e-viran se rangin ghazal mange hai
kaisi duniya hai jo sahra se kanval mange hai
zindagi ab to har ik lamha ḳhuda jaane kyuun
mujh se pechida savalat ke hal mange hai
ye na.i tarz-e-siyasat ye zabun-hali ab
ham se mathe pe kuchh afkar ke bal mange hai
jab se avara-mizaji ko qarar aaya hai
teri aghosh men guzre hue pal mange hai
daur-e-hazir men gharaunda bhi banana mushkil
aur mumtaz miri taj-mahal mange hai
is junun ne mujhe is darja sharaf baḳhsha hai
but-gari mujh se ajanta ka amal mange hai
jazba-e-ishq dilon se hai nadarat ‘tashna’
ashiqi aaj ki bas raah saral mange hai
Leave a Reply