nazr-e-vatan phir ai dil divana chahiye
phir har qadam pe sajda-e-shukrana chahiye
phir sar-zamin vatan ki hai nazron ke samne
phir lab pe ek nara-e-mastana chahiye
bachpan ki yaad leti hai phir dil men chutkiyan
phir be-khudi ba-hujjat-e-tiflana chahiye
barson ke baad aae hain bagh-e-vatan men ham
phir har kali ko sajda-e-mastana chahiye
kohsar sabz-posh nazar aae duur se
phir lab pe chaar bait ka afsana chahiye
jis kuche men huiin kabhi rusvaiyan nasib
us ka tavaf ba-dil-e-divana chahiye
bakhsha tha jis ne pahle-pahal dil ko dard-e-ishq
phir us ke dar pe sajda-e-shukrana chahiye
phir dil ko ho yaqin na kisi ke visal ka
phir vaqia ba-surat-e-afsana chahiye
phir shauq se milenge kisi gul-ezar se
phir lab pe shor-e-bulbul-e-mastana chahiye
jhula jhulaenge kisi mast-e-shabab ko
raqsan faza men phir mai-o-mai-khana chahiye
paae talab ko vadi-e-parvin hai nim-gam
phir aarzu ko manzil-e-janana chahiye
phir khirman sukun ko hain darkar bijliyan
phir be-hijab jalva-e-janana chahiye
phir zauq-e-mai-kashi ko hai mearaj ki talab
kausar ka baada chand ka paimana chahiye
phir shauq ban ke dil men dhadakti hai zindagi
phir jumbish-e-tabassum-e-janana chahiye
phir sina-e-umid men raqsan hai barq-e-tur
phir pursish mazaq kalimana chahiye
bala-e-koh saya-e-abr-e-bahar men
parvin-o-mahtab ka kashana chahiye
phir us harim-e-nur ke aghosh-e-naz men
ik gul-kada ba-rang-e-pari-khana chahiye
phir abr-o-bagh-o-nikhat-o-gul ke hujum men
shama o sarv o bada-o-paimana chahiye
phir us ki chashm-e-mast pe gesu hon pur-fishan
phir abr-e-sham-gun sar-e-mai-khana chahiye
phir chandni men daman-e-dariya ye ai nadim
raqs-e-sharab-o-gardish-e-paimana chahiye
josh-e-tarab ne hashr sa dil men kiya bapa
phir be-khudi ko girya-e-mastana chahiye
‘akhtar’ vatan men aa ke khula hai ye husn-e-raz
is mukhtasar si umr men kya kya na chahiye
Leave a Reply