hai chaman men rahm gulchin ko na kuchh sayyad ko
ab khuda hi shaad rakkhe bulbul-e-nashad ko
sujhti thi koh-o-sahra men yahi har dam mujhe
kijiye gham qais ka aur roiye farhad ko
hichkiyan aati hain par lete nahin vo mera naam
dekhna un ki faramoshi ko meri yaad ko
yaad men un ke havas-e-khamsa de dete hain ham
aah ko naale ko ghul ko shor ko fariyad ko
jaegi gulshan talak us gul ki aamad ki khabar
aaegi bulbul mire ghar men mubarakbad ko
nazaa ke dam bhi unhen hichki na aaegi kabhi
yunhi gar bhule rahenge vo ‘sakhi’ ki yaad ko