Bashar Nawaz
bahut tha khauf jis ka phir vahi qissa nikal aaya
mire dukh se kisi avaz ka rishta nikal aaya
vo sar se paanv tak jaise sulagti shaam ka manzar
ye kis jaadu ki basti men dil-e-tanha nikal aaya
jin ankhon ki udasi men bayaban saans lete hain
unhin ki yaad men naghmon ka ye dariya nikal aaya
sulagte dil ke angan men hui khvabon ki phir barish
kahin konpal mahak utthi kahin patta nikal aaya
pighal uthta hai ik ik lafz jin honton ki hiddat se
main un ki aanch pi kar aur bhi sachcha nikal aaya
guman tha zindagi be-samt o be-manzil bayaban hai
magar ik naam par phulon-bhara rasta nikal aaya
Leave a Reply