Main Zinda Hun

akhiri raat thi vo

main ne dil se ye kaha

harf jo likkhe gae

aur jo zaban boli gai

sabhi be-kar gae

main bhi ab haar gaya yaar bhi sab haar gae

koi chara nahin juz-tark-e-taalluq ai dil

ik sada aur sahi akhiri baar

jism se chheda use ruuh se chhu le use

akhiri baar bahe saz-e-badan se koi naghma koi lai

akhiri raat hai ye

akhiri baar hai ye zaiqa-e-bosa-o-lams

akhiri baar chhalak jaae lahu

garmi-e-jan se mahak jaae nafas ki khushbu

khvab men khvab ke manind utar ja ai dil

akhiri raat thi vo

phir guzar ku-e-nadamat se hua to dekha

baam raushan hai jo tha

aur darvaze pe dastak hai vahi

mera qatil dar-o-divar pe kuchh naqsh banata hai abhi

ungliyan khuun se tar dil-e-kam-zarf ko hai vahama-e-arz-e-hunar

din ki har baat hui be-tauqir

raat hai aur zamir

chashm hai muntazir-e-khvab-e-digar

khvab aate hain thaharte hain chale jaate hain

aur qatil ki saza ye bhi ki main zinda huun

Leave a Comment