Yagana Un Ka Begana Hai Begana Yagana Hai

Poet

yagana un ka begana hai begana yagana hai

ḳhuda.i se nirala un buton ka karḳhana hai

nigah-e-naz se said apna murgh-e-dil nahin hota

kabhi uḌta nahin navak se jo vo ye nishana hai

udhar kaliyan chaTakti hain idhar shor-e-anadil hai

chaman men kis ki aamad hai ye kaisa shadiyana hai

junun ne ki hai qabr-e-qais ki is tarah ara.ish

charagh-e-ghul raushan hain bagula shamiyana hai

hamara hal-e-dil sunne se dil par choT lagti hai

uḌa deta hai niind ankhon se jo vo ye fasana hai

phala-phula na kisht-e-dahr men tuḳhm-e-umid-e-dil

nahin agah jo nashv-o-numa se ye vo daana hai

jahan koshish zara ki naqd-e-mazmun us se haath aaya

zamin-e-sher men bhi dafn kya koi ḳhazana hai

bayan karta hai mere vasf aksar apni mahfil men

ye us ayyar ki mujh se lagavaT gha.ebana hai

nava-sanji se meri bulbulon ke hosh uḌte hain

gulon se bhi kahin rangin siva mera tarana hai

tu mushtaqon se apne chashm-poshi roz karta hai

tire didar ki daulat bhi qarun ka ḳhazana hai

urus-e-marg se shadi hui hai ḳhuun se lab tar hai

gale men ye shahid-e-naz ke joḌa shahana hai

kal un se puchh lenge karte ho ab bhi dil-azari

jahan tak chahen kar len zulm aaj un ka zamana hai

hamen baḳhshe na baḳhshe daḳhl ya marzi men malik ki

vagarna us ki rahmat ko to darkar ik bahana hai

jabin-sa rahte hain har-dam malak jinn-o-bashar to kya

dar-e-daulat sara-e-yar ka vo astana hai

anadil ki sada kya buum bhi hai jis jagah anqa

‘qalaq’ is gulshan-e-viran men apna ashiyana hai