jo tamam umr ban kar mira hausla rahi hai
vahi aaj meri ghairat mujhe aazma rahi hai
miri fikr jaane mujh ko kahan le ke ja rahi hai
ki qadam qadam pe manzil sar-e-rah aa rahi hai
nahin chhoḌti hai mujh ko kisi moḌ par ye duniya
main ise rula raha huun ye mujhe rula rahi hai
tu ye janta hai phir bhi nahin fikr aḳhirat ki
tiri maut rafta rafta tire paas aa rahi hai
jo ab aa ga.e ho tum to mujhe chhoḌ kar na jaana
ki tumhare bin ye hasti baḌi be-maza rahi hai
miri zindagi ke malik main ye tujh se puchhta huun
mujhe kyon jahan men bheja miri kya ḳhata rahi hai
ye na ho ki vaqt-e-aḳhir rahe dil ki baat dil men
miri jaan ab to aa ja miri jaan ja rahi hai
jo tumhen mila hai mansab use da.imi na samjho
kisi ek ki hukumat yahan kab sada rahi hai
mujhe ab ye lag raha hai vo ḳhizan thi Thiik ‘rahbar’
ye bahar kaise kaise na.e gul khila rahi hai
Leave a Reply