Ahmad Husain Mail
vo but pari hai nikalen na bal-o-par taaviz
hain donon baazu pe is ke idhar udhar taaviz
vo ham nahin jo hon divane aise kamon se
kise pilate ho paani men ghol kar taaviz
uthega phir na kaleje men mitha mitha dard
agar likhe mire dil par tiri nazar taaviz
kahan vo log ki jin ke amal ka shohra tha
kuchh is zamane men rakhta nahin asar taaviz
pilaya saanp ko paani jo man nikal liya
nahane baithe hain choti se khol kar taaviz
vahan gaya jo koi dil hi bhuul kar aaya
rakhe hain gaad ke us ne idhar udhar taaviz
pas-e-fana bhi mohabbat ka silsila na mita
tire gale men hai aur meri qabr par taaviz
ye bhed hai ki na murde daren farishton se
bana ke qabr banate hain qabr par taaviz
ye kya ki zulf men rakkha hai bandh kar mira dil
use bhi ghol ke pi jaao jaan kar taaviz
jo chand se hain badan hain vo chand taron men
gulon men haikalen haikal ke ta-kamar taaviz
hue hain hazrat-e-‘mail’ bhi dil men ab qaail
kuchh aisa likhti hai ai jaan tiri nazar taaviz
Leave a Reply