hai lahu shahidon ka naqsh-e-javedan yaaro
maqtalon men hoti hai aaj bhi azaan yaaro
sail-e-vaqt huun mujh ko kaun rok sakta hai
chhin lo qalam chahe kaaT lo zaban yaaro
bal-o-par ki mahrumi aur ḳhuun rulati hai
jab bhi dekh leta huun su-e-asman yaaro
is nigah-e-baham ko aur kis se duun nisbat
nok-e-be-sinan yaaro tiir be-kaman yaaro
un ki bazm-e-rangin ka ahal to na tha lekin
kaam aa ga.i meri shoḳhi-e-bayan yaaro
ye bhi apne mehvar ki samt lauTta hoga
be-sabab nahin uThta aag se dhuan yaaro
is sadi ne baḳhsha hai mujh ko ek naya lahja
mujh se chhuT nahin sakti jiddat-e-bayan yaaro
Leave a Reply