khula hai jhuuT ka bazar aao sach bolen
na ho bala se ḳharidar aao sach bolen
sukut chhaya hai insaniyat ki qadron par
yahi hai mauqa-e-iz.har aao sach bolen
hamen gavah banaya hai vaqt ne apna
ba-nam-e-azmat-e-kirdar aao sach bolen
suna hai vaqt ka hakim baḌa hi munsif hai
pukar kar sar-e-darbar aao sach bolen
tamam shahr men kya ek bhi nahin mansur
kahenge kya rasan-o-dar aao sach bolen
baja ki ḳhu-e-vafa ek bhi hasin men nahin
kahan ke ham bhi vafadar aao sach bolen
jo vasf ham men nahin kyuun karen kisi men talash
agar zamir hai bedar aao sach bolen
chhupa.e se kahin chhupte hain daagh chehre ke
nazar hai a.ina-bardar aao sach bolen
‘qatil’ jin pe sada pattharon ko pyaar aaya
kidhar ga.e vo gunahgar aao sach bolen
Leave a Reply