ham jo guzre un ki mahfil ke qarib
ik kasak si rah ga.i dal ke qarib
sab ke sab baiThe the qatil ke qarib
be-kasi thi sirf bismil ke qarib
zindagi kya thi ajab tufan thi
ab kahin pahunche hain manzil ke qarib
is qadar ḳhud-rafta-e-sahra hue
bhuul kar dekha na mahmil ke qarib
haa.e us muḳhtar ki majburiyan
jis ne dam toḌa ho manzil ke qarib
zindagi-o-maut vahid aa.ina
aadmi hai hadd-e-fasil ke qarib
ye tajahul arifana hai janab
bhuul kar jaana na ghafil ke qarib
tarbiyat ko husn-e-sohbat chahiye
baiThiye ustad-e-kamil ke qarib
hosh ki kahta hai divana sada
aur mayusi hai aaqil ke qarib
dekhiye un bad-nasibon ka ma.aal
vo jo Duube aa ke sahil ke qarib
chha.i hai ‘gulzar’ men fasl-e-ḳhizan
phuul hain sab gul shama.il ke qarib
Leave a Reply