Karrar Noori
ḳhud apne ghar men hain is tarah aaj aa.e hue
ki jaise ghar men kisi ke hon ham bula.e hue
ki jaise ab koi ḳhurshid aa hi ja.ega
hain apne ghar ke andheron se lau laga.e hue
ḳhuda kare dar-o-divar kaan rakhte hon
zamana guzra hai rudad-e-gham suna.e hue
in andhiyon men na jaane kidhar se aa jaao
main ja raha huun har ik su diya jala.e hue
garan guzarti hai ab shahr ki har ik avaz
suna rahe hain vo qisse jo hain suna.e hue
ho jaise jurm-e-mohabbat men meri nakami
har ik se rahta huun ‘nuri’ nazar bacha.e hue
Leave a Reply