Nigahen Muntazir Hain Kis Ki Dil Ko Justuju Kya Hai

Akhtar Saeed Khan

nigahen muntazir hain kis ki dil ko justuju kya hai

mujhe ḳhud bhi nahin ma.alum meri aarzu kya hai

badalti ja rahi hai karvaTon par karvaTen duniya

kisi surat nahin khulta jahan-e-rang-o-bu kya hai

ye socha dil ko nazr-e-arzu karte hue ham ne

nigah-e-husn-e-ḳhud-ara men dil ki aabru kya hai

mujhe ab dekhti hai zindagi yuun be-niyazana

ki jaise puchhti ho kaun ho tum justuju kya hai

hua karti hai dil se guftugu be-ḳhvab raton men

magar khulta nahin mujh par ki ‘aḳhtar’ guftugu kya hai

main in ankhon ko kya samjhun ki apni ḳhana-virani

jinhen ye bhi nahin ma.alum ḳhun-e-arzu kya hai

kiran suraj ki kahti hai phir aa.egi shab-e-hijran

sahar hoti hai ‘aḳhtar’ so raho ye hav-hu kya hai