Khursheed Rizvi
phir vo gum-gashta havale mujhe vapas kar de
vo shab o roz vo rishte mujhe vapas kar de
aankh se dil ne kaha rang-e-jahan shauq se dekh
mere dekhe hue sapne mujhe vapas kar de
men tujhe duun tiri paani ki likhi tahriren
tu vo ḳhun-nab navishte mujhe vapas kar de
main shab o roz ka hasil use lauTa dunga
vaqt agar mere khilaune mujhe vapas kar de
mujh se le le sadaf o gauhar o marjan ka hisab
aur vo gharqab safine mujhe vapas kar de
nusḳha-e-marham-e-iksir batane vaale
tu mira zaḳhm to pahle mujhe vapas kar de
haath par ḳhaka-e-taqdir banane vaale
yuun tahi-dast na dar se mujhe vapas kar de
asman sub.h ke asar se pahle pahle
meri qismat ke sitare mujhe vapas kar de
main tiri umr-e-guzishta ki sada huun ‘ḳhurshid’
apne nakam irade mujhe vapas kar de
Leave a Reply