Hum Had-E-Indimal Se Bhi Gae

Arsh Siddiqui

ham had-e-indimal se bhi ga.e

ab fareb-e-ḳhayal se bhi ga.e

dil pe taala zaban par pahra

yaani ab arz-e-hal se bhi ga.e

jam-e-jam ki talash le Duubi

apne jam-e-sifal se bhi ga.e

ḳhauf-e-kam-ma.egi bura ho tira

arzu-e-visal se bhi ga.e

shorish-e-zindagi tamam hui

gardish-e-mah-o-sal se bhi ga.e

yuun miTe ham ki ab zaval nahin

shauq-e-auj-e-kamal se bhi ga.e

ham ne chaha tha teri chaal chalen

haa.e ham apni chaal se bhi ga.e

husn-e-farda ḳhayal-o-ḳhvab raha

aur maazi o haal se bhi ga.e

ham tahi-dast vaqf-e-gham hain vahi

tang-na-e-saval se bhi ga.e

sajda bhi ‘arsh’ un ko kar dekha

is rah-e-pa.emal se bhi ga.e