Lage Khadang Jab Us Nala-E-Sahar Ka Sa

lage khadang jab us nala-e-sahar ka sa

falak ka haal na ho kya mire jigar ka sa

na jaunga kabhi jannat men main na jaunga

agar na hovega naqsha tumhare ghar ka sa

kare na khana-kharabi tiri nadamat-e-jaur

ki ab-e-sharm men hai josh chashm-e-tar ka sa

ye josh yaas to dekho ki apne qatl ke vaqt

dua-e-vasl na ki vaqt tha asar ka sa

lage un ankhon se har-vaqt ai dil-e-sad-chak

tira na rutba hua kyuun shigaf-e-dar ka sa

zara ho garmi-e-sohbat to khaak kar de charkh

mira surur hai gul-khanda-e-sharar ka sa

ye na-tavan huun ki huun aur nazar nahin aata

mira bhi haal hua teri hi kamar ka sa

junun ke josh se begana-var hain ahbab

hamara haal vatan men hua safar ka sa

khabar nahin ki use kya hua par is dar par

nishan-e-pa nazar aata hai nama-bar ka sa

dil aise shokh ko ‘momin’ ne de diya ki vo hai

muhib husain ka aur dil rakhe shimar ka sa