Bashir Mehtaab
kis masti men ab rahta huun
ḳhud ko ḳhud men DhunD raha huun
duniya men sab se hi juda huun
aḳhir main kis duniya ka huun
main to ḳhud ko bhuul chuka huun
tum batla do kaun huun kya huun
ye bhi nahin hai yaad mujhe ab
kyuun aḳhir rota rahta huun
ik duniya hai mere andar
us men hi main ghuum raha huun
mujh ko niind hai pyari ya phir
us ko bhi main hi pyara huun
vo ruḳh apna pher chuke hain
main kis ko apna kahta huun
in lafzon ne manzil chhini
aap chalen main abhi aata huun
man to ḳhushiyan baanT raha hai
main qatra qatra rota huun
ḳhud ka bojh hai kitna ḳhud par
kitna ḳhud ko jhel raha huun
mujh ko tum ‘mahtab’ na samjho
shayad main us ka saaya huun
Leave a Reply