va.ada-ḳhilaf kitne hain ai rashk-e-mah aap
sach to ye hai ki jhuTon ke hain badshah aap
daftar siyah karte hain kyuun katib-e-amal
huun maghrib gunahon ka main ru-siyah aap
ham se to dil men aap ke ab tak na ghar hua
kar lete hain dilon men ye kis tarah raah aap
ye gah bhi kafsh-ḳhana hai aḳhir huzur ka
tashrif yaan bhi laaya karen gaah gaah aap
mahshar talak rahega in ankhon ko shauq-e-did
dekhen ki ab dikhate hain ta-chand raah aap
tashbih naam ankhon ki hai sujhna muhal
saari bayaz karte hain na-haq siyah aap
kuchh husn hi hain afsar-e-ḳhuban nahin huzur
hain mulk-e-an-o-naz ke bhi badshah aap
aariz abhi hain ruup pe ḳhat aane dijiye
kar lijiyega farq-e-safed-o-siyah aap
kyuun us ne ku-e-yar se bahar nikale paanv
majnun hua hai haath se apne tabah aap
kalima paḌhe huzur ka dekhe jo samri
rakhte hain aisi sehr ki chashm-o-nigah aap
sab ashiqon ke ek se hote nahin chain
khoTa khara parakhne ki rakhiye nigah aap
darmandon ka hai kaun ba-juz un ke dast-gir
apne apahijon ko vo lenge nibah aap
mujh ru-siyah ki hai ye dua vaqt-e-baz-purs
rakhiyega apne lutf-o-karam par nigah aap
ulfat ka kya yahi hai natija jahan men
ashiq ko qatl karte hain kyuun be-gunah aap
dil de ke bahr-e-fikr men ho ghota-zan abas
dariya-e-ishq ki nahin pa.enge thaah aap
azm-e-safar to mulk-e-adam ka hai ai ‘qalaq’
kuchh apne saath le bhi chale zad-e-rah aap
Leave a Reply