ret se but na bana ai mire achchhe fankar
ek lamhe ko thahar main tujhe patthar la duun
main tire samne ambar laga duun lekin
kaun se rang ka patthar tire kaam aaega
surkh patthar jise dil kahti hai be-dil duniya
ya vo pathrai hui aankh ka niila patthar
jis men sadiyon ke tahayyur ke pade hon dore
kya tujhe ruuh ke patthar ki zarurat hogi
jis pe haq baat bhi patthar ki tarah girti hai
ik vo patthar hai jo kahlata hai tahzib-e-safed
us ke marmar men siyah khuun jhalak jaata hai
ek insaf ka patthar bhi to hota hai magar
haath men tesha-e-zar ho to vo haath aata hai
jitne meyar hain is daur ke sab patthar hain
jitni aqdar hain is daur ki sab patthar hain
sabza o gul bhi hava aur faza bhi patthar
mera ilham tira zehn-e-rasa bhi patthar
is zamane men to har fan ka nishan patthar hai
haath patthar hain tire meri zaban patthar hai
ret se but na bana ai mire achchhe fankar
Leave a Reply