Jazib Quraishi
dil ke zaḳhm jalte hain dil ke zaḳhm jalne do
ham ko Thokaren kha kar aap hi sambhalne do
raushni fasilon ko toḌ kar bhi aa.egi
raat ki syahi ko karvaTen badalne do
sa.eban ki ḳhvahish men ik safar huun sahra ka
jism-o-jan pighalte hain jism-o-jan pighalne do
pattharon ki choTon se aa.ino na ghabrao
hadson ke angan men zindagi ko palne do
gham ki dhuup men jal kar rah ga.i har ik chhanv
ham ko apni chahat ke saa.e saa.e chalne do
Leave a Reply