aisa nahin ki un se mohabbat nahin mujhe
ifsha-e-raz-e-ishq ki jur.at nahin mujhe
jalve hain un ke nau-ba-nau meri nigah men
ab un ko gham ye hai gham-e-furqat nahin mujhe
rakhna hai un ke paanv pe ja kar sar-e-niyaz
ruk ja ajal kya itni bhi mohlat nahin mujhe
shoridgi-e-ishq kahan le ke aa ga.i
phulon se bhi jahan koi raghbat nahin mujhe
hoti hai un se pahron tasavvur men guftugu
sochun kuchh aur itni bhi fursat nahin mujhe
rusva jahan men kar diya us jazb-e-shauq ne
maqsud varna ishq men shohrat nahin mujhe
is darja jhuuT sunta raha huun tamam umr
sunne ki sach bhi ab koi aadat nahin mujhe
ab un se hal-e-dil main bayan ‘soz’ kya karun
apni zaban par bhi to qudrat nahin mujhe
Leave a Reply