vaise to ik dusre ki sab sunte hain
jin ko sunana chahta huun kab sunte hain
ab bhi vahi din raat hain lekin farq ye hai
pahle bola karte the ab sunte hain
shak apni hi zaat pe hone lagta hai
apni baten dusron se jab sunte hain
mahfil men jin ko sunne ki taab na thi
vo baten tanha.i men ab sunte hain
jiina ham ko vaise bhi kab aata tha
badal ga.e hain jiine ke Dhab sunte hain
ankhen chhu kar dekhti hain avazon ko
kaan duha.i dete hain lab sunte hain
sunte zarur hain duniya vaale bhi ‘shahzad’
kahne ki ḳhvahish na rahe tab sunte hain
Leave a Reply