us se taslim bas yunhi si hai
barf ehsas ki jami si hai
chaliye ahbab ko to jaan ga.e
ye musibat to aarzi si hai
kuchh to charagari kare koi
aaj kuchh dard men kami si hai
aaj chupke se kis ki yaad aa.i
dil ke angan men chandni si hai
kis ne tark-e-vafa kiya pahle
ye shikayat bhi bahami si hai
hasrato ab to ho chalo ḳhamosh
nabz bimar ki thami si hai
umr guzri jise bayan karte
vo katha ab bhi an-kahi si hai
Leave a Reply