Nisar Nasik
sambhal ke dekha to kanch sa jism kirchiyon men baTa hua tha
ḳhabar nahin hai ki mere andar vo ik dhamaka sa kiya hua tha
vo kho gaya tha to yuun laga tha ki izzat-e-nafs luT ga.i hai
main roz ke milne vaale logon men ik khilauna bana hua tha
ḳhizan ki vo sard raat bhi main ne ghar se bahar guzar di thi
ki mere bistar pe laash ban kar mira hi saaya paḌa hua tha
sab apni apni sada ke parcham supurd-e-shab kar ke so chuke the
bas ek main hi muhib lamhon ke lashkaron men ghira hua tha
jise vo sanson ki loriyon se mire badan men sula ga.i thi
palaT ke aa.i to vo chahakta sharir bachcha mara hua tha
ye ek parchha.in si jo sadiyon se mere ham-rah chal rahi hai
yahi mira harf-e-ibtida hai main jis se ik din juda hua tha
Leave a Reply