Be-Khayali Mein Kaha Tha Ki Shanasai Nahin

be-khayali men kaha tha ki shanasai nahin

zindagi ruuth gai laut ke phir aai nahin

jo samajhna hi na chahe use samjhai nahin

jo bhi ik baar kahi baat vo dohrai nahin

husn saada hai tira main bhi bahut aam si huun

meri ankhon men kisi niil ki gahrai nahin

mera hissa mujhe khamoshi se de deta hai

dard ke aage hatheli kabhi phailai nahin

apne afkar liye pahlu-nashin ho ke raha

dil se darvesh ne duniya tiri apnai nahin

shab ke tarik labon par hai kai saal ki chup

khud se naraz hai itni kabhi muskai nahin

baas phulon ki chura li hai havaon ne magar

jo kali yaad ki teri hai vo murjhai nahin

aag ye donon taraf kyuun na barabar si lage

haae vo ishq hi kya jis men pazirai nahin

be-irada bhi koi kaam taattul na pada

ba-irada thi mulaqat ki shab aai nahin

Leave a Comment