aaj phir dasht koi abla-pa mange hai
ḳhaar bhi tazgi-e-rang-e-hina mange hai
zabt-e-gham dast-ras-e-ah-e-rasa mange hai
ye andhera tire aariz ki ziya mange hai
jan-dahi tishna-labi abla-pa.i be-sud
dasht-e-ghurbat to kuchh is ke bhi siva mange hai
phunk raha hai gham-e-hasti se vajud-e-insan
zindagi ab tire daman ki hava mange hai
aap chupke se use zahr ka piyala de den
jo rivayat se baghavat ka sila mange hai
chand siine se laga.e hai mira naqsh-e-qadam
aur suraj miri sanson ki sada mange hai
Leave a Reply