jo ghazal mahlon se chal kar jhonpaḌon tak aa ga.i
kal sunoge gaanv ke chaupal tak par chha ga.i
khet men jo chug rahi thi qaid men ghabra ga.i
gaanv ki maina jo aa.i shahr men dubra ga.i
aisi raani jis ka ji lagta na tha vanvas main
ik mohabbat ki badaulat us ko kuTiya bha ga.i
senk deta tha jo jaaḌe men gharibon ke badan
aaj us suraj ko ik divar uTh kar kha ga.i
kaisi kaisi shaḳhsiyat algav-vadi ho ga.i
kaise kaise zehn ko firqa-parasti kha ga.i
us ki sattar ki kama.i aur pachasi ka hai ḳharch
aadmi achchha tha us ko ghar ki chinta kha ga.i
ek pal men umr-bhar ka saath chhuTa hai ‘nazir’
bad-gumani zindagi-bhar ki kama.i kha ga.i
Leave a Reply