aa.ina ruuTh gaya hai tire jaane ke baad
ik andhera sa bichha hai tire jaane ke baad
kis qadar TuuT ke barse hain ye badal gham ke
asman chiḳh uTha hai tire jaane ke baad
dil ke TukḌe hue barsat hui ashkon ki
kya kahun kya kya hua hai tire jaane ke baad
zehn bhi chup hai zaban chup hai nazar bhi chup hai
ham ne bhi kuchh na kaha hai tire jaane ke baad
chiḳhta khanDar hai roti hai haveli dil ki
ghar ye aseb-zada hai tire jaane ke baad
ghar men dipak hi jala hai na koi sham-e-vafa
muddaton dil hi jala hai tire jaane ke baad
aisi Thokar kabhi khaa.i na thi is se pahle
mujh ko sadma sa laga hai tire jaane ke baad
ye zamana hi nahin ḳhud se bhi ‘arpit’ mujh ko
kuchh ta.alluq na raha hai tire jaane ke baad
Leave a Reply