Gulnar Aafreen
shajar-e-ummid bhi jal gaya vo vafa ki shakh bhi jal gai
mire dil ka naqsha badal gaya miri subh raat men dhal gai
vahi zindagi jo bahr nafas jo bahr qadam mire saath thi
kabhi mera saath bhi chhod kar miri manzilen bhi badal gai
na vo aarzu hai na justuju na koi tasavvur-e-rang-o-bu
liye dil men dagh-e-gham-e-khizan main chaman se duur nikal gai
tiri chaal puuri na ho saki tira vaar khali chala gaya
zara dekh gardish-e-asman ki main girte girte sambhal gai
tiri chahaton se sanvar gae ye mire jamal ke aine
main gulab ban ke mahak uthi main shafaq ke rang men dhal gai
ye tilism-e-mausam-e-gul nahin ki ye mojaza hai bahar ka
vo kali jo shakh se gir gai vo saba ki god men pal gai
vahi saat-e-gham-e-arzu jo hamesha dil men basi rahi
hai khuda ka shukr ki ‘afrin’ vo hamare sar se to tal gai
Leave a Reply