Nau Bahar Sabir
duur tha sahil bahut dariya bhi tughyani men tha
ik shikasta-nav sa main tez-rau paani men tha
mujh se milne koi aata bhi to milta kis tarah
main to ghar men band ḳhud apni nigahbani men tha
adamiyat ke evaz us ne ḳharida hai libas
aadmi tha aadmi jab ahd-e-uryani men tha
hai club ke rang-o-ramish men bhi mere saath saath
ek sannaTa jo dil ki ḳhana-virani men tha
tha vo mere ḳhair-maqdam ko ba-zahir pesh pesh
aks-e-digar lekin us ki ḳhanda-peshani men tha
maqtal-e-sham-o-sahar men kya panapti zindagi
shabnamistan honkte sho.alon ki nigarani men tha
mausam-e-gul bhi junun-parvar tha lekin beshtar
maslahat ka haath meri chak-damani men tha
‘sabir’ us manzar ki movie le raha tha ek shaḳhs
shaḳh par ik ashiyan sho.alon ki tabani men tha
Leave a Reply