adu to chhoḌ diye ḳhair-ḳhvah maar diye
muhafizon ne ka.i be-gunah maar diye
bahut sata.e hue lashkaron ki haibat ne
darun-e-qasr ka.i badshah maar diye
lahu taḌapne laga hai ki surḳh noTon ne
bhari kach.hari men saare gavah maar diye
andhera jab bhi baḌhaya gaya zamane men
charagh-e-haq ne sabhi ru-siyah maar diye
jab aa.i baat kabhi hamsari se masnad par
to sarbarahon ne kuchh sarbarah maar diye
nahin hai vaqt sa ‘adil’ koi yahan jis ne
kulahen rol diin aur kaj-kulah maar diye
Leave a Reply