Dopahar Raat Aa Chuki Hila-Bahana Ho Chuka

dopahar raat aa chuki hila-bahana ho chuka

aur masti mil chuke gesu men shana ho chuka

navak-e-mizhgan ka apna dil nishana ho chuka

mar chuke ham maut aane ka bahana ho chuka

ahd-e-piri hai javani ka zamana ho chuka

khatm ab mazmun sher-e-ashiqana ho chuka

ab khizan hai mausam-e-gul ka zamana ho chuka

ho chuki gul-bang bulbul ka tarana ho chuka

shiir se shirin ko raghbat thi unhen hai zauq-e-mai

daur bhi ab aur hai agla zamana ho chuka

saqiya piiri men to shaghl-e-subuhi hai zarur

ab bhi pichhla daur hai agla zamana ho chuka

shabnami par os padti hai jo apni ziist men

to pas-e-murdan lahad par shamiyana ho chuka

ham to gard-e-karvan the sab se pichhe rah gae

qafila reg-e-ravan ka bhi ravana ho chuka

asman par taan-e-bukhl ahl-e-zamin ko hai abas

paani paani ho gaya jab daana daana ho chuka

chat chuke qaid-e-qafas se ab asiran-e-chaman

baad virane ke abad ashiyana ho chuka

amad-e-fasl-e-bahari ki khabar laai nasim

baagh men bulbul ka tayyar ashiyana ho chuka

kya khizan men ab-o-rang-e-bagh favvaron se ho

sab zar-e-gul lut chuka khali khazana ho chuka

vaae nadani ki ab fikr-e-subuk-doshi hui

daftar-e-isyann jab apna bar-e-shana ho chuka

gil utha zanjir se pariyon ka divana hai ye

ishq men badnam main khana-ba-khana ho chuka

gor tak vo saath mayyat ke rahe had ho gai

dushman-e-jan se bhi haqq-e-dostana ho chuka

ham faqiron ke bhi ghar laai thi un ko sadgi

ab vo lillah hai buton ka karkhana ho chuka

khvab-e-ghaflat ‘mehr’ kab tak jagiye uth baithiye

subh hone aai shab guzri fasana ho chuka

Leave a Comment