Dushyant Kumar
vo aadmi nahin hai mukammal bayan hai
mathe pe us ke choT ka gahra nishan hai
vo kar rahe hain ishq pe sanjida guftugu
main kya bata.un mera kahin aur dhyan hai
saman kuchh nahin hai phaTe-hal hai magar
jhole men us ke paas koi sanvidhan hai
us sar-phire ko yuun nahin bahla sakenge aap
vo aadmi naya hai magar savdhan hai
phisle jo us jagah to luḌhakte chale ga.e
ham ko pata nahin tha ki itni Dhalan hai
dekhe hain ham ne daur ka.i ab ḳhabar nahin
paaon tale zamin hai ya asman hai
vo aadmi mila tha mujhe us ki baat se
aisa laga ki vo bhi bahut be-zaban hai
Leave a Reply