Madrasa Ali-Gadh

khuda ali-gadh ke madrase ko tamam amraz se shifa de

bhare hue hain rais-zade amir-zade sharif-zade

latif o khush-vaza chust o chalak o saaf o pakiza shad-o-khurram

tabiaton men hai in ki jaudat dilon men in ke hain nek irade

kamal-e-mehnat se padh rahe hain kamal-e-ghairat se padh rahe hain

savar mashriq raah men hain to maghribi raah men piyade

har ik hai in men ka be-shak aisa ki aap use chahte hain jaisa

dikhave mahfil men qadd-e-raana jo aap aaen to sar jhuka de

faqir mange to saaf kah den ki tu hai mazbut ja kama kha

qubul farmaen aap davat to apna sarmaya kul khila de

buton se in ko nahin lagavat mison ki lete nahin vo aahat

tamam quvvat hai sarf-e-khvandan nazar ke bhole hain dil ke saade

nazar bhi aae jo zulf-e-pechan to samjhen ye koi policy hai

electric light us ko samjhen jo barq-vash koi kuude

nikalte hain kar ke ghol-bandi ba-nam-e-tahzib o dard-mandi

ye kah ke lete hain sab se chande jo tum hamen do tumhen khuda de

unhen isi baat par yaqin hai ki bas yahi asl kar-e-din hai

isi se hoga farogh-e-qaumi isi se chamkenge baap daade

makan-e-college ke sab makin hain abhi unhen tajrabe nahin hain

khabar nahin hai ki aage chal kar hai kaisi manzil hain kaise jaade

dilon men in ke hain nur-e-iman qavi nahin hai magar nigahban

hava-e-mantiq ada-e-tifli ye shama aisa na ho bujha de

fareb de kar nikale matlab sikhae tahqir-e-din-o-mazhab

mita de akhir ko din-o-mazhab numud-e-zati ko go badha de

yahi bas ‘akbar’ ki iltija hai janab baari men ye dua hai

uluum o hikmat ka dars in ko professor den samajh khuda de

Leave a Comment