kahin ankhen kahin baazu kahin se sar nikal aa.e
andhera phailte hi har taraf se Dar nikal aa.e
hue hain khokhle ham log hijrat men so Darte hain
ḳhala ye ruuh ka aisa na ho bahar nikal aa.e
ye lagta hai ki patton pe rakhi thiin muntazir ankhen
mire aate hi kitne phuul shaḳhon par nikal aa.e
na jaane khol de kab koi lamha yaad ki gaThri
kisi kone se maazi ka hasin manzar nikal aa.e
mire honTon pe bikhra ye tabassum Dhaal hai meri
ki jaane kab udasi ka kahin ḳhanjar nikal aa.e
gire hain jitne aansu daman-e-sahra men sadiyon se
sulagti ret bhi andar se shayad tar nikal aa.e
Leave a Reply