bar-e-digar ye falsafe dekhun
zaḳhm phir se hare-bhare dekhun
ye basirat ajab basirat hai
a.inon men bhi aa.ine dekhun
zaviyon se agar najat mile
saare manzar ghule-mile dekhun
nazm karna hai be-hisabi ko
lafz saare nape-tule dekhun
aḳhir aḳhir jo dastan na bane
avval avval vo vaqiye dekhun
duriyan dhund ban ke bikhri hain
kuchh qarib aa ki fasle dekhun
ek nashsha hai ḳhud-numa.i bhi
jo ye utre to phir tujhe dekhun
le gaya vo bachi-khuchi ninden
ḳhvab kaise rahe-sahe dekhun
raat phaili hui hai milon tak
kya charaghon ke da.ere dekhun
Leave a Reply