dil ka mo.amla nigah-e-ashna ke saath
aise hai jaise rabta-e-gul saba ke saath
dekho to pech-o-tab ki surat ki mil ga.i
sham-e-firaq bhi tiri zulf-e-dota ke saath
ye kya bahar hai ki dikha.i ga.i mujhe
sho.alon ki aanch bhi gul-e-rangin-qaba ke saath
ye kya tilism hai ki sunaya gaya mujhe
saz-e-shikast-e-dil tiri avaz-e-pa ke saath
ai dosto yahi hai qayamat ki roz-e-hashr
ham bhi jaga.e ja.enge ḳhalq-e-ḳhuda ke saath
gulshan men aa.i pairahan-e-rang ban ga.i
vo mauj-e-ḳhun ki chehra-kusha thi hina ke saath
‘abid’ bayan-e-jalva-nagah kya karun
ḳhubi ada ke saath hai shoḳhi haya ke saath
Leave a Reply