Dil Ka Moamla Nigah-E-Ashna Ke Sath

dil kā mo.āmla nigah-e-āshnā ke saath

aise hai jaise rābta-e-gul sabā ke saath

dekho to pech-o-tāb kī sūrat ki mil ga.ī

shām-e-firāq bhī tirī zulf-e-dotā ke saath

ye kyā bahār hai ki dikhā.ī ga.ī mujhe

sho.aloñ kī aañch bhī gul-e-rañgīñ-qabā ke saath

ye kyā tilism hai ki sunāyā gayā mujhe

sāz-e-shikast-e-dil tirī āvāz-e-pā ke saath

ai dosto yahī hai qayāmat kī roz-e-hashr

ham bhī jagā.e jā.eñge ḳhalq-e-ḳhudā ke saath

gulshan meñ aa.ī pairahan-e-rañg ban ga.ī

vo mauj-e-ḳhūñ ki chehra-kushā thī hinā ke saath

‘ābid’ bayān-e-jalva-nāgāh kyā karūñ

ḳhūbī adā ke saath hai shoḳhī hayā ke saath

Leave a Comment